O Ártico funciona coma un climatizador e del depende o clima global, pero segue a ser o océano máis desprotexido do planeta
O problema
O xeo do Ártico exerce de refrixerador global, reflectindo a calor solar cara o espazo e mantendo fresco o planeta. Malia que o que ocorre no Ártico repercute en toda a Terra, este espazo é un dos máis desprotexidos e está aberto a múltiples ameazas.
Tres cuartas partes da capa de xeo boiante do Ártico desapareceron nos últimos 30 anos. A destrución do seu xeo fai do océano Ártico un lugar moito máis navegábel e expono á pesca masiva e á extracción de petróleo, gas e minerais. Estas circunstancias xeran unha gran variedade de choques de intereses, algúns tan graves como posíbeis conflitos bélicos.
Ademais dos cambios locais que terán un impacto directo sobre a biodiversidade do Ártico e os seus medios de vida, haberá cambios “remotos” que afectarán distintas partes do planeta, como España, onde os nosos hábitats naturais se verán afectados polo aumento das temperaturas.
«Para poder salvar o xeo do Ártico, os expertos indican que o aumento da temperatura global debe situarse por debaixo dos 1,5 ºC»
Cal é a solución?
A queima de combustíbeis fósiles é o principal causante do cambio climático, polo que a solución pasa por rematar coa dependencia do petróleo e demais combustíbeis fósiles.
A prohibición das prospeccións, da libre navegación comercial, das accións militares e da pesca industrial no seu territorio é prioritaria. Con ese obxectivo, Greenpeace propón a creación dun gran santuario mariño que salvagarde o Ártico de calquera acción intrusiva.
Un dos marcos perfectos nas relacións internacionais para acadalo sería a través dun Tratado Global dos Océanos, que podería supor a creación dunha área mariña protexida nas augas do alto ártico, fixando mecanismos vinculantes e de obrigado cumprimento para os estados membros.
Que está a facer Greenpeace?
O obxectivo da nosa campaña a longo prazo é a creación dun santuario global no Ártico que o protexa das prospeccións petrolíferas, da pesca industrial e do tráfico marítimo nas novas vías creadas polo desxeo.
Greenpeace traballa xunto con outras organizacións no desenvolvemento dun Tratado de Protección da vida mariña en alta mar nas Nacións Unidas para a creación do Santuario Ártico, así como para a protección das augas internacionais en todo o mundo.
Que podes facer ti
Pide ás Nacións Unidas que protexa esta zona única declarándoa santuario.
Actúa co teu consumo! Unha das principais ameazas do Ártico é o cambio climático, que provoca o seu desxeo. Por iso, é importante sermos conscientes de como consumimos enerxía e facérmolo do xeito máis eficiente posíbel para reducirmos a nosa pegada de carbono. Aquí propoñémosche algúns consellos para iso.
Súmate a Greenpeace! Forma parte da nosa organización para esixir ás empresas que non exploten o Ártico para a pesca ou a extracción de petróleo e para pedirlles aos gobernos mundiais que avancen na protección do Ártico. Preme aquí para te unires a Greenpeace!