Nafarroako Klimaren Aliantzak salatu du Nafar Gobernuak, aplikatu ez duen, Klima Aldaketari eta Trantsizio Energetikoari buruzko Foru Legea aldatu nahi duela hau malgutzeko

Nafarroako Gobernuak jendaurrean aurkeztu du Klima Aldaketari eta Trantsizio Energetikoari buruzko Foru Legearen (AKTEFL) aldaketa bat. Aldaketa horren helburua ez da legearen aplikazioa indartzea, ezta bizkortzea ere; aitzitik, haren irismena murriztea, erregelamenduak ezabatzea eta betebeharrak gomendio anbiguo bihurtzea da, justu klima-aldaketa azkartzen ari den eta ausardia politikoa eskatzen duen une honetan. Nafarroako Klimaren Aldeko Aliantzak salatu du erreforma hau, “arintze” gisa mozorrotua, berez legegintza-atzerakada bat dela, eta arriskuan jartzen dituela Nafarroak 2030erako dituen asmo gutxiko klima-helburuak. “Mugimendu hau deigarria da bere burua progresistatzat duen Gobernu batean, Trumpen eta eskuin muturreko bere kide europarren erregresio klimatikoarekin gehiago lerrokatzen dela baitirudi, bere gobernuen aldetik anbizio klimatiko handiagoa eskatzen duen biztanleria osoarekin baino”, adierazi dute aliantzatik.

2022ko martxoan AKTEFL legea onartu zenetik, ez da ganoraz inplementatu: ez dira bere erregelamenduak garatu, ez dira bere epeak bete, eta ez da ezarritako betebeharren ikuskapen sistema aktibatu. Hala eta guztiz ere, Gobernuak orain aldatzea erabaki du, ez geldotasun hori zuzentzeko, baizik eta anbizioa gutxitzeko.

Hona hemen beherapen horren adibide esanguratsu batzuk:

• Txosten klimatikoak kentzea, Gobernuaren plan eta programa guztiak arintze eta egokitze helburuekin bat egitea bermatzen zutenak. 
• Atzeratu egin da energia-iturri gisa gasolioa hornitzeko debekua, eta 2029ra arte luzatu da, arrazoizko marjina egon arren.
• Betebeharrak hautazkoak bihurtzea, hala nola enpresek karbono-aztarna kalkulatzea.
• Foru lege eta dekretuetan klima-inpaktuari buruzko txostenen betekizuna ezabatzea, politika publikoan klima-ikuspegiaren integrazioa are gehiago ahulduz.

Hori guztia klima-larrialdiaren testuinguru kezkagarrian gertatzen da:

• Nafarroako emisioak %3,7 bakarrik jaitsi dira 2022an, aurreko urtearekin alderatuta, MITERDen azken datuen arabera.
• Nafarroak 1990eko mailen gainetik jarraitzen du %16an (Estatu osoan %4ko murrizketaren aurrean), eta ondorioz, gero eta zailagoa da 2030erako %55eko murrizketa helburua betetzea, legeak berak eskatzen duen moduan.
• Nafarroak 2030erako %55eko murrizketaren helburuak bete nahi baditu, emisioak urtean %15 murriztu beharko lirateke, hau da, 2022an lortutakoa baino 5 aldiz azkarrago murriztu beharko lirateke.

Klimaren Aldeko Aliantzak ohartarazi du: “Lege bat betetzeko borondaterik gabe aldatzea ez da aurrerapena, makillaje politikoa da”. Bien bitartean, Klima Aldaketaren aldeko Herritarren Asanblada –Nafarroan parte-hartze publikoa izateko aukera historikoa– aurrera doa, bere proposamenek itxuraz inolako eraginik izan gabe eta benetan aplikatzeko konpromisorik hartu gabe. “Gobernuak benetan sinesten badu klima urgentzia eta herritarren parte-hartzearen baliozkotasuna, ondorio horiek integratu beharko lituzke lege erreforma honetan”, ondorioztatu du Aliantzak.

Nafarroako Klimaren aldeko Aliantzak dei egiten die lehenbailehen Foru Parlamentuko alderdiei, herritarrei, komunikabideei eta gizarte zibilari ezkutuko atzerapauso hori ez ahalbidetzeko. Eta exijitu du, legea aldatuko denez, legea berrindartzeko egin dadila, ez husteko.

Nafarroako Klimaren aldeko Aliantza osatzen duten eragileak:

ACCIÓN CLIMA, CGT, EKOLOGISTAK MARTXAN, EQUO, EXTINCTION REBELION, TFF (Profesores por el clima), GREENPEACE, REAS, OXFAM INTERMON, FRIDAYS FOR FUTURE, ZUREUR – ZURELUR