Mila pertsona baino gehiagok “Agur Guggenheim” mezua daraman mosaiko erraldoia osatu dute, Urdaibaiko handitze-proiektua bertan behera geratu dela ospatzeko
- Greenpeacek bat egin du Guggenheim Urdaibai Stop Plataformak antolatu duen ospakizun jardunaldiarekin. Egun osoan milaka pertsona bildu dira Biosferaren Erreserbaren bihotzean
- Museoaren eraikuntzarekin lotutako erreserba lehengoratzeko MITERDek eman nahi zituen 40 milioi euroak gauzatzeko eskatu du erakundeak
- Era berean, gogorarazi du Muruetako ontziolek iraungitako emakida batekin funtzionatzen jarraitzen dutela, eta agintariei exijitu die neurriak har ditzatela enpresak bere jarduera geldiarazteko eta eremua jatorrizko egoerara lehengoratzeko
- Greenpeacek MITERDen aurka jarritako demandaren aldeko epaia espero du. Izan ere, Kosta Legea aldatu zuten Muruetako egoitza eraiki ahal izateko, eta hori aurrekari arriskutsua izan daiteke interes pribatuen alde babes-araudiak hausteko
Guggenheim Museoa Urdaibaira zabaltzeko proiektua geldiarazteko Guggenheim Urdaibai Stop Plataformak Biosferaren Erreserbaren bihotzean antolatu duen jardunaldiarekin bat egin du gaur Greenpeacek. Ekitaldiaren une nagusia “Guggenheim agur” mezuarekin egindako mosaikoa izan da, eta 1000 pertsona baino gehiagok hartu dute parte. Guggenheim Fundazioak iazko abenduan iragarri zuen plana bertan behera utziko zuela, hilabeteetako protesten eta kontrako mobilizazio masiboaren ostean.
“Zoragarria da borroka honetan bat egin dugun pertsona eta erakunde guztiekin ospatu ahal izatea Euskal Herriko naturagune baliotsuenetako bat larriki mehatxatzen zuen proiektu honen amaiera. Batzuetan badirudi etorkizuna beltza dela azken urteetan gertatzen ari den guztiarekin, eta ikusita erakundeen erantzuna ez dela iristen ari aurre egiten ari garen krisi klimatikoari eta bioaniztasunaren galerari aurre egiteko behar den mailara. Baina hau bezalako garaipenek aurrera jarraitzeko arnasa ematen digute”, adierazi du Lorea Flores Euskadiko Greenpeaceko koordinatzaileak.
Nahiz eta gaur antolakundea eta herriko taldeak ospakizunetan egon, ez dute ahazten oraindik bide luzea dagoela egiteko. Urdaibaiko Biosfera Erreserbak mehatxupean jarraitzen du hainbat faktoreren eta administrazioen utzikeriaren ondorioz. Alde horretatik, gogora ekarri behar da Trantsizio Ekologikorako eta Erronka Demografikorako Ministerioak hitzarmen bat sinatu zuela Bizkaiko Foru Aldundiarekin, eta horren bidez 40 milioi euro bideratuko zirela museoa eraikitzearekin lotutako lehengoratze-jardueretarako. Orain, museoa eraikiko ez denez, lehengoratze lanak beharrezkoak izaten jarraitzen dute: Greenpeacek uste du hitzarmen hori mantendu egin beharko litzatekeela, eta funts horiek Urdaibaiko Biosfera Erreserbako eremurik kaltetuenak leheneratzeko erabili beharko liratekeela.
Ezinbestekoa da naturguneak eta, bereziki, hezeguneak leheneratzea, biodibertsitatearen galera geldiarazteko. Esparru horretan, Espainiako Natura Lehengoratzeko Plan Nazionala egiten ari dira, hau beharrezkoa izanik 2024an gai horri buruz onartutako Europako araudiaren transposizioa egiteko. Araudi horrek 2030erako ekosistema degradatuen % 20 eta 2050erako ekosistema guztiak leheneratzeko helburuak ezartzen ditu.
Bestalde, Muruetako Ontziolen etorkizuna zintzilik dago, oraindik ere martxan jarraitzen baitute emakida iraungita egon arren. Proiektu honen aurka borrokatu diren erakundeek agintariei eskatzen diete neurriak har ditzatela ontziolak eremua utzi eta lehengoratu dezan, jatorrizko egoerara itzuliz.
Azkenik, Kostaldeen Legea aldatzen zuen Trantsizio Ekologikorako eta Erronka Demografikorako Ministerioaren (MITERD) aginduaren aurka talde ekologistak jarritako demanda oraindik ebatzi gabe dago, itsasoko eta lurreko jabari publikoaren babes-zerrenda 100 metrotik 20 metrora murrizteko eta, horrela, Muruetako egoitzari lekua egiteko. “Greenpeacetik espero dugu justiziak arrazoia emango digula eta Kosta Legearen aldaketa hau baliogabetuko duela, aurrekari bat sortzen baitu interes pribatuen alde babes-araudiak urratu ahal izateko”, gaineratu du Floresek, eta dei batekin amaitu du: “Kalera irtetea, Urdaibaiko Erreserba bezalako gune enblematikoak defendatzeagatik mobilizatzea gizartearen eginbeharra da, eta hau mobilizazioak funtzionatzen duenaren adibide argia da”.
