Ecoloxistas en Acción e Greenpeace entran na sede da Xunta de Galicia en Vigo para rexeitar o atentado ambiental e social de Altri

18-03-2025

  • Unha ducia de activistas entraron no rexistro da sede da Xunta de Galicia en Vigo para rexeitar con contundencia a DIA favorábel á fábrica de celulosa de Altri/Greenfiber
  • As ONG esixen á Xunta que, dada a enorme controversia social xerada e as dúbidas sobre o proceso, faga publicos xa os informes sectoriais que dan o primeiro aval ambiental á planta da Ulloa
  • Para as organizacións, o documento publicado pola Xunta retorce a normativa ambiental para axudar á empresa a instalarse dando todo tipo de facilidades e confiando a cegas na vontade do promotor
  • Fan un chamamento a espallar a mobilización por toda Galicia e animan á sociedade a acudir masivamente o vindeiro 22 de marzo á manifestación en defensa da ría de Arousa na Pobra do Caramiñal ás 12:00 horas

 

Activistas de Ecoloxistas en Acción e Greenpeace amosaron hoxe na sede da Xunta de Galicia en Vigo o seu rexeitamento á Declaración de Impacto Ambiental (DIA) favorábel á instalación da fábrica de celulosa de Altri/Greenfiber en Palas de Rei. Con carteis nos que se lía “Altri Non”, as organizacións esixiron por rexistro á Xunta de Galicia que, dada a gran controversia social xerada no país e ás enormes dúbidas que existen sobre a limpeza do proceso de avaliación ambiental, faga públicos xa os informes sectoriais nos que se cimenta a viabilidade da planta na DIA.

Estamos ante o proxecto industrial máis lesivo que se presentou en Galicia nas últimas décadas. A excepcionalidade do mesmo e a enorme mobilización social xerada na súa contra esixen tamén unha transparencia excepcional e un trato igualitario con respecto á empresa, que si puido dar resposta a todos os informes sectoriais de maneira detallada, segundo afirmou o seu CEO, José Soares de Pina. Calquera cidadán ou cidadá galega é parte interesada nisto. Vimos pedir á Xunta que informe de igual xeito á cidadanía e que deixe de actuar como xuíz e parte”, afirman dende as organizacións.

Segundo as ONG, a DIA favorável a Altri non causou sorpresa, por canto a Xunta de Galicia leva estendendo unha alfombra vermella á empresa dende que Nuñez Feijoó anunciara o mesmo en 2022, malia que daquela o proxecto difería moito do actual e se agachou á mantenta a fabricación masiva de celulosa. Porén, trátase dunha DIA que parece máis un libro de instrucións para meter a calzador a fábrica na Ulloa que para garantir a súa viabilidade ambiental, afirman as organizacións.

Chamamos ao pobo galego á mobilización permanente en todas as vilas do país. Esta DIA favorábel para a macrocelulosa non é, nin moito menos, o final do proceso, aínda quedan trámites administrativos e tamén o percorrido nos xulgados se o proxecto é finalmente autorizado. Imos dar a batalla nas rúas e onde sexa necesario”, declaran desde as organizacións ecoloxistas.  Sinalan, ademais, que “sen fondos públicos Altri nunca será unha realidade, por iso é moi importante que o Goberno central teña presente o rexeitamento social masivo que xerou este proxecto de celulosa. A sociedade galega non entendería que se financiase esta barbaridade con fondos públicos”.

Finalmente, Ecoloxistas en Acción e Greenpeace animan ás galegas e galegos a acudir masivamente o sábado 22 de marzo á manifestación en defensa da ría de Arousa, convocada na Pobra do Caramiñal ás 12:00, para amosar o seu rexeitamento á macrocelulosa e esixir á Xunta a que rectifique.


Comparte!