Escaladores de Greenpeace despregan unha pancarta no cume hispanoalemán para pedir que os cartos do gasoduto MidCat se invistan en renovábeis

Esta tarde, 10 activistas de Greenpeace despregaron unha enorme pancarta nunha estada situada fronte ao edificio onde se celebra o cume hispanoalemán, co texto “Os cartos para o midcat, para renovábeis xustas xa!” A organización ecoloxista reclama ao presidente Sánchez e ao chanceler Scholz que non se siga investindo en infraestruturas de gas, carísimas e que non solucionan os problemas enerxéticos da poboación a curto prazo. Os investimentos para transportar máis gas a Europa son unha falsa solución: desvían o foco da necesaria transición a enerxías renovábeis e antepoñen os intereses da industria gasista fronte ás necesidades das persoas que van sufrir un inverno con prezos desorbitados da luz e do gas.

A organización ecoloxista basea a súa posición en varios informes técnicos e científicos. publicados recentemente por consultoras especializadas como Artelys  (Marzo 2022), Bellona (Marzo 2022), EG3 (Junio 2022),  ECF,  ou Universidade Pompeu Fabra (2022) que consideran que esta e outras infraestruturas de gas como o Midcat non son necesarias pois para a data na que entren en servizo a demanda de gas na UE deberá sufrir un forte descenso ocasionado polas políticas de descarbonización. Os informes expertos tamén conclúen que, se o tempo e o investimento necesarios para infraestruturas de gas e hidróxeno se dirixen a descarbonizar con enerxías limpas e eficientes, as necesidades da cidadanía resultarían mellor atendidas e poderíase substituír a meirande parte das importacións de gas ruso para 2025, data na que o MidCat podería comezar a utilizarse.

“Sánchez e Scholz deben abandonar proxectos de alto custo económico e climático como o Midcat e asinar un compromiso de colaboración para acelerar a transición enerxética cara ás enerxías renovábeis, a eficiencia e o aforro, que respondan as necesidades da cidadanía e fagan fronte á emerxencia climática. España non debe nin pode ser un hub de gas, senón de enerxía renovábel”, declarou José Luis García, responsábel de Clima en Greenpeace.

Doutra banda, o proxecto é incompatíbel cos compromisos climáticos da Unión Europea e dos países directamente implicados (España, Francia e Alemaña). Se a UE quere cumprir co obxectivo climático do Acordo de París, cómpre deixar atrás o uso do gas fósil para 2035. Greenpeace considera que non ten sentido construír unha infraestrutura como o MidCat (ou outras alternativas gasistas), que probabelmente non se poida concluír antes do 2025 como moi cedo.

O últimos sete anos foron os máis cálidos xamais rexistrados, sufrimos o verán que trouxo intensas ondas de calor e lumes inapagábeis, e sabemos que serán cada vez máis frecuentes polo quecemento do planeta. Non podemos perder máis tempo para afrontar a emerxencia climática e desviar recursos a falsas solucións ou a aumentar a subministración de combustíbeis fósiles, que son a súa causa principal. 

A organización ecoloxista sinala que o consumo de gas en toda Europa, incluídos España e Alemaña, é moi desigual: a meirande parte do mesmo é consumido por industrias e centrais eléctricas. Para resolver a crise enerxética a curto prazo e de maneira xusta, os esforzos deberían enfocarse na redución da demanda en sectores non esenciais que consomen máis, garantindo o dereito á enerxía da poboación máis vulnerábel. En paralelo débese investir en axudas públicas e cambios lexislativos para incrementar a eficiencia mediante reformas exprés de vivendas, servizos e industrias que se consideren esenciais. As axudas deben ir a quen as necesita para cubrir os servizos enerxéticos esenciais (como a calefacción) sen facer medrar  a dependencia do gas.

Cómpre lembrar que, segundo o IPCC, o metano, principal compoñente do gas natural, ten un potencial de quecemento global 86 veces superior ao do CO2 nunha escala temporal de 20 anos. As fugas de metano acontecen en toda a cadea de produción, transporte e distribución. A construción de novos gasodutos conleva a utilización deste combustíbel fósil durante moitos anos máis, contribuíndo a facer máis grave a emerxencia climática actual. Do mesmo xeito, Greenpeace pon de manifesto que hai serias dúbidas técnicas de que un gasoduto poida utilizarse para o transporte de hidróxeno e mesmo de se ten sentido facelo, dadas as perdas enerxéticas que conleva. O hidróxeno producido con fontes renovábeis é un vector enerxético moi pouco eficiente e só debe empregarse en aplicacións moi específicas alí onde sexa difícil a descarbonización. O transporte do hidróxeno en longas distancias é moi difícil e pouco eficiente, polo que debería evitarse. O hidróxeno ten o seu papel na transición enerxética, mais sempre de proximidade e non como substituto do gas nas redes existentes.