Greenpeace chama aos galegos e galegas a se sumaren á manifestación deste sábado para berrar por terra e por mar “Altri Non!”

Este sábado, 22 de marzo, ás 12.00, a sociedade galega está chamada a participar na manifestación convocada pola Plataforma en Defensa da Ría de Arousa e secundada por decenas de colectivos, entre eles Greenpeace, na Pobra do Caramiñal (A Coruña). A manifestación por terra partirá ás 12.00 da estación de buses da Pobra e chegará á enseada do Caramiñal, onde máis de 500 embarcacións concentraranse ata que finalice a lectura do manifesto, prevista ás 12.45 no escenario habilitado no porto.

Para Greenpeace, a intención por parte da Xunta e as empresas Altri e Greenalia de instalar unha fábrica de celulosa na Ulloa é absolutamente inasumíbel desde o punto de vista socioambiental, xa que tería unhas consecuencias catastróficas para a integridade ecolóxica de todo o territorio e sería un desastre para a biodiversidade. O proxecto industrial, agora apoiado por unha Declaración de Impacto Ambiental que a organización cualifica como inconsistente, pouco rigorosa e extremadamente opaca, está a provocar a maior contestación social vista en Galicia nas últimas décadas. Os galegos e as galegas saben que Altri non é o modelo de desenvolvemento que necesita o seu país porque pon en serio perigo as súas comunidades, os seus modos de vida tan ligados á natureza e mesmo o futuro das vindeiras xeracións. Greenpeace pide á Xunta e á empresa que escoiten o clamor social e que renuncien a seguir adiante cun proxecto que Galicia non quere nin necesita, nin vai aceptar. Altri Non!