Reactivo de Greenpeace perante Declaración de Impacto Ambiental da celulosa de Altri

Greenpeace non vai parar até deter o proxecto de Altri, que cualifica coma un atentado ambiental e social

14-03-2025

Greenpeace rexeita con contundencia a resolución pola que se formula a Declaración de Impacto Ambiental do proxecto de fábrica de celulosa de Altri/Greenfiber, publicada hoxe no Diario Oficial de Galicia. Para a organización, o documento publicado non vai dirixido a avaliar a viabilidade do proxecto, senón a axudar á empresa para instalarse dando todo tipo de facilidades ao retorcer a normativa ambiental, facer análises máis que cuestionábeis, deixar demasiados cabos soltos e o que é peor, confiar excesivamente na vontade do promotor.

A resolución de hoxe é a esperada e, sen dúbida, será rebatida por todos os medios por parte de Greenpeace no momento no que se conceda a autorización. Se atendemos ás declaracións e pasos dados por Alfonso Rueda, Ánxeles Vázquez e María Jesús Lorenzana nos últimos anos a favor do promotor, resulta evidente que a Xunta xa aprobou tacitamente o proxecto en 2022, cando o Goberno de Alberto Núñez Feijoó iniciou a declaración de Proxecto Industrial Estratéxico (PIE). O de hoxe non é máis que a confirmación de que a protección da natureza para este Goberno é máis unha molestia que unha necesidade”, declarou Manoel Santos, coordinador de Greenpeace en Galicia.

Greenpeace considera que a DIA publicada hoxe é un libro de instrucións para que Altri atente contra o medio ambiente e a sociedade galegas coa beizón da Xunta de Galicia. Non parece de recibo que os condicionantes ambientais apuntados polo documento se dirixan, en innumerables ocasións, ao que xa é unha obriga para calquera actividade no territorio, ou que se propoña un programa de vixilancia ambiental dando a entender que a Xunta fai deixamento de funcións noutros casos. Danse paradoxos mesmo absurdos, como aceptar unha suposta “zona de amortecemento”, de só 50 metros de ancho, para protexer a Rede Natura proposta polo promotor, cando a Xunta hai semanas eliminou toda a superficie que vai ocupar a empresa da zona de amortecemento da Estratexia Galega de Infraestrutura Verde.

Sexa como for, a DIA non é o final do proceso. A Xunta veranos na rúa, nos procesos administrativos e tamén nos xulgados até que este proxecto sexa desbotado. Ademais, sen fondos públicos Altri nunca será unha realidade. Agardamos que o Goberno central teña máis sensibilidade que a Xunta co medio ambiente e coa sociedade galega, que se mobilizou como nunca –presentáronse 27.000 alegacións, recolléronse máis de 600.000 sinaturas– e ten dereito a escoller que modelo de desenvolvemento quere para o seu país”, conclúe Manoel Santos.

Greenpeace aproveita para facer un chamamento á sociedade galega a acudir masivamente o próximo 22 de marzo á manifestación en defensa da ría de Arousa convocada na Pobra do Caramiñal ás 12:00 horas, para demostrar que a Xunta se trabuca.


Comparte!