Manuel viuse atrapado no que se coñece como unha Demanda Estratéxica contra a Participación Pública (SLAPP, polas súas siglas en inglés). Trátase de demandas presentadas por actores poderosos, xeralmente grandes empresas ou despachos, para acosar e silenciar a quen denuncia algunha irregularidade en favor do interese público. As vítimas máis habituais destas demandas son activistas, xornalistas independentes ou investigadores, que desempeñan unha función de vixilancia imprescindíbel nos sistemas democráticos.

Anti SLAPP. Ilustración de Electronic Frontier Foundation

Estas “demandas mordaza” son unha forma de intimidación legal e acoso xudicial, xa que utilizan os seus poderosos medios para asfixiar a estas persoas ou ás súas organizacións a través complexos e custosos procesos xudiciais, de tal xeito que en ocasións vense na obriga de abandonar o seu labor para centrarse durante anos na defensa dun proceso que lles podería arruinar. O resultado final é o menos importante para estes demandantes, porque o seu principal obxectivo é a ameaza e a anulación da capacidade de reacción de quen expón as súas críticas. En definitiva, é unha forma privada de limitar a liberdade de expresión.

As SLAPP, cada vez máis frecuentes en Europa

O termo SLAPP ten as súas raíces en Estados Unidos, onde nas últimas décadas resultou ser un fenómeno realmente preocupante para a liberdade de expresión, tanto que hogano algúns estados implementaron lexislación para evitar este tipo de demandas. Así aconteceu tamén en Canadá e en Australia. Pero o certo é que esta práctica de acoso xudicial está cada vez máis estendida en Europa, onde non existe ningunha lexislación a día de hoxe que as regule.