Usamos cookies para mellorar a túa experiencia.
Entendemos que estás de acordo se segues navegando.

Greenpeace rexeita a construción do túnel da Porta do Sol polo seu impacto negativo na mobilidade urbana de Vigo

18-09-2019

  • O soterramento do tráfico incentiva o uso do coche no centro urbano e responde a un modelo de cidade desfasado que lembra a tempos do ‘Scalextric’ de Alfonso XIII, Lepanto e Gran Vía
  • O orzamento da obra, de 17 millóns de euros, dedícase na súa maior parte a unha infraestrutura con grande impacto visual e acústico nas súas ramplas de acceso, tal e como denuncia a asociación ‘Vigo Histórico’
  • Na Semana Europea da Mobilidade, Greenpeace convida a Abel Caballero a que se fixe no modelo de Pontevedra, recoñecido mundialmente pola súa eficacia ao reducir o tráfico e incrementar os desprazamentos a pé

(Aquí en castellano)

Vigo, 18 de setembro de 2019.- A organización ecoloxista Greenpeace rexeita a construción do túnel en Porta do Sol polos graves impactos no centro histórico de Vigo e na súa mobilidade. Baixo a premisa da peonalización dunha zona emblemática, o proxecto expón executar 200 metros de túnel para que o tráfico privado siga a atravesar o centro de Vigo. Unha obra que xa conta cunha importante oposición veciñal, ao dedicar a meirande parte do seu orzamento para perpetuar o tráfico rodado en lugar de reducilo.

A execución deste túnel conleva a creación de senllas ramplas de acceso nas rúas Elduayen e Policarpo Sanz. Unhas ramplas que xeran un ‘efecto barreira’ ao non poder cruzarse  transversalmente e que, asemade, supoñen un foco de contaminación visual e acústica, debido á  reverberación do ruído dos coches no interior do túnel. O proxecto contempla 140 metros de rampla para conseguir apenas 200 metros de rúa peonil. Unhas cifras que, en opinión de Greenpeace, deberían ser abondas para reformularse a utilidade dun túnel que racha co consenso social da peonalización e a trama urbana do centro da cidade.

Un túnel que coloca a Vigo fóra das cidades sustentábeis en mobilidade

Amais do impacto na contorna da obra, Greenpeace advirte que a construción do túnel supón un incentivo directo ao uso do coche para atravesar o centro. Durante estes días ten lugar a Semana Europea da Mobilidade, cita na que a Comisión Europea lembra as vantaxes das cidades que apostan os modos sustentábeis e a redución do tráfico privado. Un modelo oposto ao que se pretende con este túnel, que convida os condutores a seguir atravesando o centro en coche en lugar de optar por outros medios de transporte, o que incrementará a presión do tráfico na contorna o centro histórico.

O alcalde de Vigo, Abel Caballero, respostou ás críticas ao proxecto afirmando que “o progreso nesta cidade non o detén ninguén”. Greenpeace considera que o alcalde ten unha idea  desfasada do concepto de “progreso”, máis propia do desenvolvismo dos anos 60 que dedicou a maioría do espazo público ao tráfico. Un modelo que se demostrou errado e que tivo o seu reflexo en Vigo no vergoñento ‘scalextric’ de Alfonso XIII –hoxe desmontado– que se ideou para incrementar o número de vehículos no centro da cidade igual que o túnel que agora se propón.

Actualmente o progreso márcano aquelas cidades que reducen o acceso aos vehículos contaminantes, tal e como recolleu Greenpeace recentemente no seu Mapa da fin do diésel e da gasolina. Un mapa que xa inclúe ás cidades galegas de Pontevedra e A Coruña, grazas ás súas políticas para crear centros urbanos libres de tráfico, impulsando o transporte público e os desprazamentos a pé, o modo menos contaminante e máis accesíbel.

“O alcalde ten unha idea moi anticuada sobre o progreso. Hoxe as cidades líderes en mobilidade centran os seus esforzos en dar alternativas e reducir os coches, non en soterralos”, sinalou Adrián Fernández, responsábel de Mobilidade de Greenpeace. “Convidamos a Abel Caballero a que se fixe no modelo de Pontevedra, unha cidade referente mundial que mellorou o seu centro urbano sen necesidade de túneles e, por tanto, sen malgastar fondos públicos para que os coches atravesen o centro”.

Greenpeace denuncia as mortes por contaminación ao “estilo DXT”

Con motivo da Semana Europea da Mobilidade, Greenpeace lanzou un anuncio no que lembra que a contaminación é responsable de 38.600 mortes prematuras ao ano en España [1]. Unha contaminación que nas grandes cidades ten a súa principal causa no tráfico rodado, xa que os motores diésel e gasolina son a maior fonte de NO2 e partículas en zonas urbanas.

O anuncio de Greenpeace segue o estilo das campañas da Dirección Xeral de Tráfico, recoñecidas pola súa efectividade para concienciar sobre a importancia da seguridade viaria. “As máis de 1.180 persoas falecidas en España por accidentes de tráfico o ano pasado resultan unha cifra inadmisíbel, pero os accidentes non son o único que mata sobre rodas, aínda que o Estado non faga tantas campañas sobre esta realidade”, afirmou Fernández na presentación do novo anuncio.

Ademais do indubidábel efecto na saúde pública, as emisións do tráfico agravan a crise climática á que nos enfrontamos. A semana pasada Greenpeace publicou nun informe que os fabricantes de automóbiles son responsábeis do 9% das emisións de efecto invernadoiro en todo o mundo [2].  Esta semana darán inicio as mobilizacións da Semana Mundial de Acción polo Clima, durante a cal, Greenpeace, en alianza con moitas organizacións e colectivos, denunciará a situación de crise climática na que nos atopamos e esixirá a toma de medidas urxentes e decididas para combatela. Unhas mobilizacións que concluirán o vindeiro venres 27 con manifestacións en numerosas cidades do mundo, incluída Vigo.

Fontes

[1] Axencia Europea do Medioambiente. 2018.
[2] “Aceleradores do Cambio Climático” Informe de Greenpeace. Setembro de 2019.


Comparte!