Clasificación de supermercados segundo a súa pegada plástica

Dá prioridade á redución pero aínda non ten unha estratexia ben definida

Por vez primeira en España, ALDI prestouse a falar con Greenpeace verbo do sobreenvasado de produtos de consumo e obtivo unha puntuación de 5.6 sobre 10 debido a que actualmente están a dar prioridade á redución de envases, están a propoñer estratexias de envases recargábeis, e xa eliminaron certos produtos dun só uso de forma definitiva como os pratos, os cubertos ou as pallas para beber. Tamén están a considerar un aumento da venda a granel noutros produtos alén da froita e verdura como os froitos secos ou o peixe conxelado, aínda que non está claro se se podería usar para isto un envase reutilizábel. Porén, aínda están a definir unha estratexia que recolla todos estes obxectivos con datas e accións concretas, e non proporcionaron datos sobre a súa pegada plástica. Ademais, actualmente non presentaron plans para retiraren dos seus establecementos os envases que non sexan 100% reciclábeis.

Volver

Quere fomentar a venda a granel, mais non ten plans para envases reutilizábeis

Grupo DIA abriuse por vez primeira ao diálogo con Greenpeace verbo do sobreenvasado de produtos de consumo e obtivo un 4,6 sobre 10 debido a que, aínda que actualmente non teñen un plan con accións concretas, crearon un grupo de traballo multidisciplinar para abordar a redución progresiva dos plásticos dun só uso dos seus produtos. Grupo DIA pretende dar prioridade á redución e eliminación de plásticos dun só uso. Os plásticos que non se poidan eliminar serán reducidos ou substituídos por outros produtos, pero non se fomentarán as alternativas con bioplásticos. Isto aplícase a froita e verdura, igual que a outras secciones que tamén están a seren consideradas. Porén, actualmente non comunicaron plans específicos para investir en accións que fomenten as alternativas reutilizábeis, e existe unha falla de transparencia sobre a súa pegada plástica. Grupo DIA tamén está a traballar cos produtores e provedores, aínda que polo momento non hai accións concretas ao respecto.

Volver

Comprométese a retirar os plásticos que con meirande frecuencia se atopan nos océanos, pero substitúe unha gran cantidade de plásticos por outros materiais tamén dun só uso

Carrefour ten unha nota total de 4,2 sobre 10 debido a que, aínda que se comprometeron a reducir un 21% dos plásticos dun só uso para 2021 debido ao acordo alcanzado pola patronal*, isto só incluirá os produtos frescos que se envasan en tenda. Por tanto, é un compromiso insuficiente que só afectará a menos dunha cuarta parte de froitas, verduras e outros produtos frescos. Ademais, actualmente non son transparentes respecto á súa pegada plástica nin teñen plans concretos para cambiar o seu modelo de distribución de xeito que se fomente a reutilización. Polo de agora, están a substituír gran cantidade dos plásticos dun só uso por outros materiais biodegradábeis, compostábeis ou reciclábeis, que seguirán a causar impactos negativos no medio ambiente e que non nos afastan da cultura de usar e desbotar. Aínda que se comprometeron a eliminar todos os plásticos da súa froita e verdura BIO, só eliminarán os que non sexan reciclábeis, polo que poderíamos seguir atopando envases de plástico reciclábeis en froita e verdura BIO. Carrefour comprometeuse a retirar do mercado os plásticos que con meirande frecuencia se atopan nos océanos, aínda que non especificaron cales son eses artigos nin para cando os retirarían. Tamén se comprometeron a contar con envases 100% reciclábeis, reutilizábeis ou compostábeis para 2025 nos seus produtos, aínda que non especificaron que porcentaxe dese 100% será reutilizábel.

Volver

Introduce a bolsa reutilizábel para froita e verdura, pero actualmente non ten plans ambiciosos para aumentar a súa venda a granel

Mercadona obtivo unha nota de 5,1 sobre 10 pois, malia decidir introducir a bolsa reutilizábel para froita e verdura, fomentando a reutilización e dando a posibilidade de mercar a granel nesta sección, non ten plans ambiciosos para seguir eliminando envases de froita e verdura, para aumentar a súa venda a granel ou para eliminar outros plásticos dun só uso dos seus lineais. Actualmente, Mercadona está a revisar todos os envases dos seus lineais para ver que poden eliminar, reducir ou substituír. Mercadona xa eliminou os microplásticos de todos os seus produtos de cosmética, e os artigos de limpeza da súa sección ECO, como os recolledores, fabrícanse exclusivamente con plástico reciclado da agricultura. Actualmente, Mercadona está a desenvolver unha estratexia para seguir reducindo os plásticos dun só uso dos seus establecementos, e esperamos que fagan transparente a súa pegada plástica, xa que, por agora, só fixeron público que conseguiron reciclar 11.000 toneladas de plástico en 2018.

Volver

Reducirá un 20% de todos os seus plásticos para 2025, pero non ten plans para fomentar a reutilización

LIDL obtén unha nota total de 4,7 sobre 10 debido a que se comprometeu a reducir un 20% de todos os plásticos da súa gama para 2025, e tamén se comprometeu a reducir un 21% dos plásticos dun só uso de produtos frescos envasados en tenda para 2021, ao igual que a patronal*. Tamén se comprometeu a que todos os seus envases sexan 100% reciclábeis para 2025. Porén, non son transparentes coa súa pegada plástica nin teñen plans por agora para cambiar o seu modelo de distribución de xeito que se fomente a reutilización dentro dos seus supermercados. Aínda que empezaron por eliminar todas as bolsas de plástico das súas caixas en España como punto de partida, non está claro se van acadar reducir os plásticos dun só uso substituíndoos por outros materiais, pois esta alternativa seguirá a fomentar a cultura de usar e desbotar. Aínda que LIDL non presentou compromisos propios con respecto a froita e verdura, adquire o compromiso da patronal* de continuar a fomentar a súa venda a granel, malia non especificar se isto se faría eliminando os seus envases.

Volver

Reducirán cando menos nun 20% as toneladas de plásticos dun só uso usados para 2025, pero substituirán moitos plásticos por outras embalaxes que poden seguir contaminando

Eroski obtivo unha puntuación de 6,2 sobre 10 debido a que, ademais do compromiso da patronal*, teñen unha estratexia moi concreta para reducir os plásticos dun só uso, aínda que en moitos casos isto comporta unha substitución por outros materiais en troques dunha eliminación real. Estiman que con estas medidas reducirán cando menos nun 20% as toneladas de plásticos dun só uso que usarán para 2025. Decidiron eliminar os plásticos en obxectos dun só uso que non sexan envases, como os pratos ou os cubertos, pero na meirande parte dos casos, substituiranos por outros materiais que, malia seren biodegradábeis ou compostábeis, poden seguir a causar danos medioambientais. Por outra banda, Eroski comprometeuse a fomentar o uso de bolsas reutilizábeis, aínda que seguirán tendo bolsas dun só uso tanto nas caixas como na sección para mercar froita e verdura. Tamén se comprometeron a aumentar a venda a granel cando menos nun 5% nalgunhas tendas durante 2019, chegando a ter ata un 64% de froita e verdura a granel, e introducirán mallas reutilizábeis para poder adquirilas sen un envase de usar e desbotar. Por agora, Eroski xa vende exclusivamente a granel múltiples produtos como cabaciñas, berenxenas, coles de Bruselas, chícharos, fabas, alcachofas ou coliflor entre outros. Ademais, comprometéronse a que para 2025 se revisen todos os seus envases para seren 100% reciclábeis, se elimine o sobreenvasado e/ou se reduza o peso do envase todo o posíbel. Por último, Eroski é por agora o supermercado que se comprometeu a ser o máis transparente de todos, adaptando os seus sistemas para facer públicos os datos de todos os envases de marca propia que poñen en circulación e do impacto que as súas medidas terán para reducir a súa pegada plástica de forma anual.

Volver

Comprométese a reducir un 21% dos plásticos de produtos frescos envasados en tenda para 2021, pero non ten un compromiso máis aló do mínimo da patronal

Alcampo non presentou ningún compromiso propio por agora, xa que están a traballar nunha estratexia de redución de plásticos, e polo tanto adquiren unicamente o compromiso presentado pola patronal* de supermercados, que ten unha nota total de 3,5 sobre 10. Esta nota obtivérona debido a que, aínda que se comprometeron a reducir un 21% dos plásticos dun só uso para 2021, farano tan só para os produtos frescos que se envasan nas tendas! É dicir, que este compromiso non inclúe nin os produtos que non son frescos (por exemplo, os froitos secos) nin os que si son frescos pero se envasan fóra das tendas (por exemplo, moitas froitas e verduras). Este compromiso parécenos un paso importante pero moi pequeno, considerando todo o que actualmente se atopa envasado e todo o que se podería eliminar. Tamén se comprometeron a seguir potenciando o uso de materiais con menor impacto ambiental no seu ciclo de vida, pero non son nada transparentes coa súa pegada plástica nin teñen plans polo de agora para cambiar o seu modelo de distribución de xeito que se fomente a reutilización. Ademais, tampouco está claro se van acadar a redución dos plásticos dun só uso substituíndoos por outros materiais ou reducindo o seu peso ou tamaño, pois estas alternativas seguirán a fomentar a cultura do usar e desbotar. A patronal de supermercados tamén se comprometeu a seguir fomentando a venda a granel en froitas e verduras, aínda que non especificaron se isto se faría eliminando os seus envases. Desde Greenpeace valoramos positivamente a existencia dun acordo de mínimos, aínda que debería ser máis concreto, para podermos saber exactamente como acadarán os seus obxectivos de redución, e máis ambicioso.

Volver

Comprométese a reducir un 21% dos plásticos de produtos frescos envasados nas tendas para 2021, pero farao mediante falsas solucións e non cunha eliminación real

Os compromisos específicos que facilitou El Corte Inglés non van máis aló dos proporcionados pola patronal*; de feito, son mesmo menores. El Corte Inglés terá que cumprir co acordo de mínimos ao que se chegou dende a patronal*, pero posto que este acordo é moi xeral, podería permitirlle non ser moi ambicioso para eliminar os plásticos dun só uso; por isto obtivo un 3,4 sobre 10. Tendo en conta a información recibida, non está nada claro que accións concretas van seguir para cumprir esas metas de redución do 21% dos produtos frescos envasados nas tendas para 2021. De feito, non proporcionaron información sobre accións concretas para fomentar as bolsas ou os envases reutilizábeis, aumentar a venda a granel ou reducir os plásticos dun só uso dos seus establecementos. Tampouco proporcionaron datos sobre a súa pegada plástica nin traballarán cos provedores para reducir os plásticos dun só uso; porén, deixarano directamente nas súas mans. Ao mesmo tempo, están a procurar alternativas desbotábeis para substituír o plástico, o que continuará a fomentar a cultura do usar e desbotar, e céntranse en proporcionar máis información tanto aos seus clientes como aos seus traballadores sobre como separar mellor os seus refugallos, o que non fará que deixemos de xeralos.

Volver